أبو العريف (عامية مصرية)..

أنا مابطيقش الشخص اللى فاكر إنه معاه الإجابة النهائية
بيعامل الناس من منطلق ان اختياراته ووجهة نظره في الحاجات هي الصح و الباقى غلطانين
المواطن اللى كل ما تقوله وجهة نظرك يبططهالك بسخافة
ودايما ينصحك بثقة كدابة و يقول لك اشترى منى
و يزعل و يعاتبك لو ماخدتش بنصيحته
ببقى عايز أقول له
عمرك فكرت في اختياراتك انت في حياتك أصلا؟
راجع كدة اختياراتك فى الحب و كام مرة لبست فى حيطة؟
افتكر كدة اختياراتك فى الأصدقاء و كم مرة انتهت بأن تستغل أقرب تجمع علشان تشكى و تنوح و تكتب بوستات تلقيح على الصداقة
افتكر اختياراتك فى الكلية التى دخلتها و خرجت من غير ما تستفيد شيء ده لو كنت اتخرجت أصلا
افتكر هدومك اللى اشتريتها و فاكر انك بتعرف فى الهدوم .. افتكر القميص الغالى اللى بعد لبستين بقى ينفع بيجامه و ماينفعش تخرج بيه
افتكر الموبايل الذى دفعت فيه دم قلبك و بعدين خلصت منه بصعوبة او مش عارف تتخلص منه لحد دلوقتى
افتكر كام مرة ماعجبكش ميكروباص ..فسيبته و ركبت اللى بعده فيطلع اللى بعده أضل سبيل بالسواق بالركاب بالموسيقى اللى شغاله فيه بكراسيه بقلة أدب و سوقية اللى بيلم الاجرة
افتكر كم مرةاخترت مطعم مشهور فنمت في السرير بعدها أسبوع على المسلوق و اللقمة الناشفة
افتكر كم مرة اخترت تقف جنب شخص محتاج فيطلع نصاب
و كم مرة اتهمت فلان كذبا بأنه نصاب فبقيت كل ما تشوفه تحط رأسك فى الأرض ككلب بلدى
افتكر كم مرة اخترت طريق مختصر فلبثت فيه يوم أو بعض يوم  أو لبست فيه بس ..مش فارقه
افتكر كم مرة اخترت النسخة الصينى من سلعة ما فندمت و اخترت الأصلى فندمت أكثر
افتكر كم مرة اخترت فكهاني من بين خمسة واقفين جنب بعض .. و تروح فتلاقى اهل بيتك بيرموا اللى انت اشتريته في الزبالة مع وصلة بعنوان “يا ما جاب الغراب لأمه فى عيد الأم ” ،
افتكر كاتبك المفضل كم مرة خذلك ؟
ومطربك المفضل كم مرة اشتغلك
و لاعبك المفضل كم مرة طالبته بالإعتزال.
افتكر تاريخك فى اختياراتك الفاشلة قبل ماتتحمق علينا
مش كده و بس لأ افتكر قد ايه كنت متحمس لاختيارك فى كل مرة
افتكر كم مرة قفشت على شخص ماخدش بنصيحتك فخسرته
افتكر عشان تعرف حضرتك أنك لا أبو العريف و لا زرقاء اليمامة ولا حتى طائر الرخ
أنت مجرد شخص طبيعى زينا نص اختياراته فى الحياة خاطئة و ربعها نجح قضاء وقدر أو بدعوات  أمك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *