عيش معايا
“إهداء إلى الصم وضعاف السمع”
عيش معايا اللحظة وسيبيك من اللغات
هنحس ببعض أكتر لو اتكلمنا بالسكات
خلينا نحلم بدنيا مكتوب فيها عبارات
من غير أي حروف ولا حتى إشارات
هات إيديك في ايديه قرب مني شوية
عشان نفهم بعض مش محتاجين كلمات
تعالى نحلم ببكرة
بمستقبل أساسه فكرة
وننسى اللي راح و اللي عدى واللي فات
أنا مش قادر أتكلم و لا أعبر
لكن قادر أتعلم وأفكر وأقرر
أنا مش قادر أصرخ ولا هقدر
لكن قادر أتخيل وأصور وأتصور
ماشي في طريقي وعايزك صديقي
كتفي بكتفك هنقدر نغير
عجز الإنسان مش عجز الكلام
عجزه يعيش من غير ما يتطور
أنا عايش معاك من غير أي صوت
لكن بفهم الكلام أكتر من السكوت
الجزء الثانى :
مش محتاجين ودان تحقق الأحلام
محتاجين العمل والصبر والصمود
هنبني بلدنا بالشغل مش بالكلام
وهتقدر تعدي وتمر وتفوت
صوت الحق عالي مش محتاج لسان
لا عمر الآمال هتخلص ولا الأفكار هتموت
مش بسمع كلامك لكن بفهمك
من نظرة عينيك أقدر أقيمك
من غير ما أتكلم ومن غير ما أسمعك
لا عايزك تتألم ولا عايز أوجعك
عايز تأخدني جنبك ضهري في ضهرك
لا عمرك تبيعينى ولا عمري أضيعك
وان نسيتني يوم لازم أفكرك
وان ضليت طريقك للحق أرجعك
لو أنت مش سامعني أنت اللي غلطان
إحساسي ومشاعري أقوى من الكلام
أنا جزء من حياتك أخرس اللسان
مش عديم الرأي ولا ضعيف الإيمان
عمر ما الحروف بتهزم أي خوف
ولا بترسم طريق مفروش بالأحلام
مش محتاجين قلم نحدد به طريقنا
كفاية عليك الريشة وعليه الألوان
لمزيد من الموضوعات :
1 تعليق
سعر جيد جدا