جايلو … مغامرة حياتية (مسرحية لأسامة الأديب)… سبق وأن تم نشر مسرحية هنا على صفحات موقع الأمنيات برس تحت اسم “حكمت المحكمة“. وقد بينت حينها أن هذه المسرحية تم كتابتها عن مشروع تعليمي تم تنفيذه لمدة 3 سنوات في عدد من محافظات مصر خاصةً في الصعيد. وقد ذكرت في مقدمة تلك المسرحية أنني قمت بكتابة 3 مسرحيات قدمت واحدة منهم هنا. وها أنا أقدم مسرحية ثانية كتبتها وقمنا بتمثيلها وآدائها انا وزملائي في العمل وقدمناها في اليوم الأخير للمشروع وهو 30/ 06/ 2011. في احتفالية نهاية المشروع مستخدمًا تحويل بعض الأغاني المشهورة إلى أغاني بكلمات جديدة خاصة بالمشروع.
ولمن لا يعرف فإن جايلو (GILO) هو الاسم المختصر للمشروع الذي كان يهتم بتحسين العملية التعليمية للبنات وللبنين في صعيد مصر. وذلك من خلال التطوير الشامل لعدد من المدارس الحكومية تحت رعاية وإشراف وزارة التربية والتعليم المصرية وبالتعاون معها. حيث أنه كان يتم الاهتمام بتطوير وتحسين المباني المدرسية، الأثاث والأجهزة والأدوات التعليمية. وأيضًا العمل على تطوير وتحسين أداء وممارسات المعلمين والمعلمات. والإدارة المدرسية والتوجيه وكذلك المشاركة المجتمعية متمثلة في مجالس الأمناء والآباء والمعلمين والمجالس الطلابية.
ماذا تعني المسميات والمصطلحات الموجودة في المسرحية؟
توجد في المسرحية مجموعة من المسميات والاصطلاحات التي يجب توضيح معناها لفهم أكثر للعمل والحوار الدائر فيه. ومن هذه المسميات والاصطلاحات:
- TPD وهي اختصار لـ Teachers Professional Development والتي المقصود بها الفريق المسئول عن التنمية المهنية للمعلمين.
- المعايير standards والمقصود بها المعايير القومية للتعليم التي نشرتها الهيئة القومية لضمان الجودة والاعتماد NAQAAE.
- المتعلم (التلميذ/ الطالب)
- المعلم
- وحدة الإرشاد التربوي (وهي وحدة تقديم الدعم الفني للمعلمين والتربويين التي أسسها المشروع)
- وحدة التدريب (تقوم بتنفيذ تدريبات لإكساب المهارات للمعلمين حسب احتياجاتهم)
- التوجيه الفني (الموجهين الفنيين في الإدارات التعليمية/ المفتشين)
جايلو… مغامرة حياتية (مسرحية لأسامة الأديب)… جايلو هو الاسم المختصر لمشروع اهتم بتحسين العملية التعليمية للبنات وللبنين في صعيد مصر.
وهذه هي الشخصيات المتواجدة في المسرحية وأبطالها الذين يحكون كيف أثر وأفاد مشروع جايلو التربوي العملية التعليمية في المدارس. هذا وقد تم ترجمة المسرحية باللغة الإنجليزية من خلالي أيضًا. أرجو أن تكون المسرحية وما تقدمه من أفكار ذات فائدة لكل المهتمين بمجالي التعليم والتربية والعمل في التنمية.
جايلو،،، مغامرة حياتية
أغنية افتتاحية للمسرحية
يا جايلوية … إيه يا لاللي
عايزين شوية … إيه يا لاللي
حاجة م اللي هي … إيه يا لاللي
حبة لقاءات على تدريبات على زيارات
***
الجايلو قال ماشي مش راجع
وساب لنا في القلب مواجع
لكن اطمئنوا ده ساب لنا دافع
للتحسيـــــــــــن
***
يا جايلوية … إيه يا لاللي
عايزين شوية … إيه يا لاللي
حاجة م اللي هي … إيه يا لاللي
حبة لقاءات على تدريبات على زيارات
***
تعالوا نرصد للـ TPD
إيه قدموا وإزاي وليه
دي شهادات من الميدان
شكراً ليكم … يا TPD
ربنا يحميكم … يا TPD
***
يا جايلوية … إيه يا لاللي
عايزين شوية … إيه يا لاللي
حاجة م اللي هي … إيه يا لاللي
حبة لقاءات على تدريبات على تراللي
المعايير (تدخل باكية وورائها المعلم والمتعلم): إهئ إهئ إهئ (تبكي)
المعلم: إيه خير… فيه إيه كفى الله الشر؟!
المتعلم: مالك يا ماما… جرى إيه للبكا ده كله؟
المعايير: صعبان علي قوي… إهه إهه إهه … جايلو يا ولاد .. جايلو .. خلاص فايتنا وماشي بعد تلات سنين كاملين … شوفوا كده الـ TPD فيه عملوا إيه … دول تلات سنين كاملين والعشرة ماتهونش برضه (تبكي)
المعلم: يا ستي متزعليش… لو جيلو مشي ما هو برضه سايب وراه أثر، بصمات رجله في كل حتة معاكي يا ماما معايير … ده مكنش بس بيسعى للتحسين، لكن كمان للتمكين .. علشان نستمر من بعده شغالين، ومتمكنين
المعايير: يا سلام يا سلام يا سلام … طيب قولي لي أنت يا معلمة .. إيه قدم لك الـ TPD اللي في جايلو علشان يحسن ويأثر، وإيه اللي فاتهولك من ميراث … التركة بتاعة جايلو فين؟؟ (تتحول من البكاء للطمع بحثاً عن الميراث) ونصيبي منها فين؟؟
المعلم: متخافيش .. كل تركة جايلو لينا، ميراثه اتوزع علينا من قبل ما يمشي، وكله ليكي علشان يكفيكي .. مش أنتي ماما المعايير اللي بتحكمي على جودة التعليم؟
المعايير(تهز رأسها): أي نعم .. أنا المعايير .. وكل التركة لي .. لو حققتوني باللي سابه جايلو يبقى ندرن علي لأزغرد في نهاية المسرحية كده هو (تزغرد أو ينطلق صوت زغرودة من الخلف)
المعلم: أنا الـ TPD قدموا لي قبل ما يمشوا بدل الهدية، مية ألف هدية … أخدت تدريبات على التعلم النشط وقدرت أفعل منها الاستراتيجيات … بقيت معلم أحضر وأخطط وأزبط والتلميذ هو اللي يشتغل وللمعلومة يوصل … ده غير كمان معرفتي للممارسات التي تخلي الفصل صديق للتلاميذ والتلميذات .. ده كفاية لعبة الفريق الأخضر … ومصادر تعلم أنتجناها واستخدمناها مش احنا بس لكن كمان بالتلاميذ ابتكرنا وطورناها … غير الكمبيوتر وتطبيقاته … ده اللي فاته TPD جايلو يبقى التعليم فاته…
جايلو… مغامرة حياتية (مسرحية لأسامة الأديب)… جايلو هو الاسم المختصر لمشروع اهتم بتحسين العملية التعليمية للبنات وللبنين في صعيد مصر.
المعايير: يا حلاوة يا حلاوة … ده الـ TPD أخر بقلاوة .. خدي حتة (ماسكة طبق فيه أكل بتاكل)
المعلم: متشكرة .. ده أنا كمان بقيت مع TPD جايلو بادرب بعد ما أخدت دورة مدربين، وبقيت في المدرسة صاين للعلم والمتعلمين … مشترك في فريق إرشاد ووحدة التدريب والجودة … ومبقتش على التعليم زي زمان حزين… شفتي بقى الـ TPD بتاع جايلو قدم لنا إيه؟
المعايير: حاجة حلوة بصحيح، بس هو مفيش غيركم في المدرسة ؟؟ طيب والصغار اللي نفسنا بتعليمهم وتحسينه نكون فخورين … إيه قدم بقى الـ TPD ليكم يا حلوين … إنتي يا قمورة يا حلوة يا صغيورة تعالي هنا ومعاكي الكورة
(تدخل الطفلة ومعها الكرة ترميها للمعايير فتلقفها ثم تردها لها مرة أخرى … وتلعب على أغنية شخبط شخابيط)
المعايير: ياللا … قوليلي يا حلوة أنت أسمك إيه؟
المتعلم: نادية … وف سنة تانية
المعايير: طيب أنتي فرحانة ليه يا نادية؟؟ شكلك مبسوطة قوي
المتعلم: أيوه … أصل أنا وزمايلي وزميلاتي في المدرسة بنلعب ونغني، وبنتعاون ونحل مسائل ومشاكل مع بعض وكمان بنمثل ده حتى أنا أخدت دور … دور (تضع أصبعها في فمها لتفكر) أيوه أخدت دور أميرة في حصة العربي وعملت كمان حرف القاف حتى بصي شوفي (تنظر للمشاهدين) قـَ قَمَرُ قُ قُمقُم قـِ قِطَةُ (تتنطط وهي تغني قطتي صغيرة واسمها نميرة – تكرر البيت الأول مرتان) شفتي احنا بقينا نقرا حلو إزاي؟؟
المعايير: يا حبيتي (تأخذها في حضنها) طيب وإيه كمان عملوا معاكم في المدرسة جايلو الفنان؟
المتعلم: مدرستنا بقت حلوة … ومدرسينا بيسيبونا نساعد وننظم .. ده احنا اللي عملنا النظام في الفصل وكتبناه في لوحة بعنوان قواعد العمل … ده غير أن فيه كمان أختي الكبيرة عضوة في فريق قادة المستقبل، وزميلتها عضوة في البرملان
المعايير: ههههههههههه اسمه البرلمان … ههههههههه
المتعلم: أيوه … هو ده … الـ بـَ رْ لـَ مَاااا نْ البرلمان (تقطيع بالطريقة الصوتية ثم تجميع – بعد أن تنتهي من قول الكلمة تصفق لنفسها في فرح وتقولJ حلوة حلوة أوي … أنا شاطرة أهه قطعت الكلمة وبعدين لميتها (جمعتها).
المعايير: شاطرة .. شاطرة .. وإيه كمان؟؟
المتعلم: كتييييير ده إحنا كمان عملنا ثورة زي اللي في التحرير، وعملنا لجان شعبية تنظم الطوابير، وشاركت أنا من فصلي، وعملنا مجلات عن المدرسة، وعن الثورة، وعن القراءة ومسابقات … ووسائل .. بصراحة أحنا في المدرسة بقينا قوي مبسوطين وفرحانين … بريلا بريلا بريليلة … بريلا بريلا بريليلة … (تخرج من المسرح وهي تنط على إيقاع الأغنية بريلا بريلا بريليلة)
المعايير: أممم .. تمام تمام TPD جايلو دول عملوا حاجات تمام … بس يا فرحتي بيهم .. قعدوا تلات سنين اشتغلوا وتعبوا وعملوا حاجات حلوة صحيح .. لكن بعد ما يمشوا ما كل حاجة هترجع زي الأول من تاني … مفيش حاجة خالص تضمن أن كل ده يستمر؟؟ مفيش، مفيش.
وحد التدريب: لأ فيه
(تتفاجأ المعايير وتقول: هما بيطلعوا امتى ومنين دول؟؟)
وحدة التدريب تكمل: لأ فيه يا ستي معايير .. أمال أنا رحت فين؟
المعايير: وأنت سيادتك ياللي خضتني تطلع مين؟
وحدة التدريب: أنا وحدة التدريب والجودة …
المعايير: اتشرفنا .. طيب وانت عملك إيه TPD جايلو … وإزاي بيك هنضمن أن كل اللي عمله هايستمر؟
وحد التدريب: أنا أقولك … TPD جايلو من ساعة ما دخل المدرسة وهو عينه علي … بصراحة أنا في الأول خفت منه.. أصلك عارفاني مؤدب وباتكسف (يحول وجهه الناحية الأخرى مع صمت لثواني علامة الخجل) ولكن بعدين أتاريه المكار بيحوم حوالين أنه يفعلني … بدأ الأول بتدريب مدرسين متميزين على أصول التدريب … وسماهم كوادر تدريب .. وبعدين ضمهم لفريقي وكان كل ما يزور المدرسة يقعد مع المسئول عني يسأله فين رصد الاحتياجات، فين الخطة .. إيه اللي قدمتوه من تدريبات .. طيب اساعد في إيه معاكم .. هات الملفات نبص فيها سوا … أيوه أمسك عندك مدرسين ضعاف في الكمبيوتر اعملهم تدريب .. عندك منهج حساب سنة أولى جديد أعملهم تدريب … (يغني على نغمة الحلم العربي) وتدريب ورا تدريب ماشيين ورا الـ TPD .. بنظبط التظابيط طيب هنشتكي من إيه؟ (مرتان وتغني معه المعايير)
المعايير: بجد .. طيب ده شيئ رائع
وحدة التدريب: وده مكنش كده سداح مداح، لأ ده كان متأسس على القرارات الوزارية في التشكيل والميزانية والمسئولية والتفعيل … يعني استمرارية في استمرارية … أي نعم أنا كنت قبله مرتاح … بس خلاص عودنا على الشغل TPD جايلو وراح وأدينا بنشتغل .. تحبي تحضري معانا الأسبوع اللي جاي تدريب؟؟
المعايير: أحب؟؟ إلا أحب دي … ده أنا أحب واحب واحب
وحدة التدريب: خلاص اتفقنا .. ده حتى في نفس اليوم ده هايكون كمان اجتماع الإرشاد لمادة اللغة العربية … تبقى فرصة تحضري الاتنين
المعايير: إرشاد … إرشاد إيه ده؟
وحدة التدريب: إيه؟ هو أنا مقلتلكيش
المعايير: لأ
وحدة التدريب: وهو أنتي متعرفيش؟
المعايير: لأ
وحدة التدريب: ده TPD جايلو مش بس فعلني … ده كمان عمل حاجة تانية تساعدني وتساندني وسماها فريق المرشدين .. وفريق المرشدين ده … الله طيب وأحكي لكم ليه … ما الإرشاد كله أهه واقف معانا ما يحكي هو وتعرفه منه أحسن (ينادي) يا إرشاد … يا إرشاد ..
الإرشاد: نعم
وحدة التدريب: تعالى يا حبيبي أدخل سلم على خالتك المعايير .. وقولها عنك كل حاجة وأوعى حاجة من دماغك تطير
المعايير: اهلاً أهلاً …
الإرشاد: أهلاً أهلاً أهلاً بيكم .. الإرشاد اتربوي بيحييكم
المعايير (ضاحكة): أهلاً وسهلاً .. ويطلع إيه بقى الإرشاد ده؟
الإرشاد: أنا مدرس أول … لمادة أساسية … دوري أني أوجه وأعقد اجتماعات … كانت على الورق منورة ومية مية … لكن جه TPD جايلو قال خلونا نهتم بالعملية التعليمية وتعالوا سوا نعمل اجتماعات وزيارات إرشادية … فبقيت مرشد
جايلو،،، مغامرة حياتية
المعايير: لسه مش فاهمة … بتعملوا إيه يعني؟؟
الإرشاد: في الأول بنعمل اجتماع مدرسين كل مادة لوحدهم … يحطوا خطة مع بعض محتاجين في اجتماعاتنا نعمل إيه؟، ومين المسئول؟ وهكذا وهكذا .. وعلشان كده فرغنا حصتين لمادة كل يوم يجتمع فيها المدرسين يِحَضَرُوا مع بعض الدروس، نعمل وسائل تعليمية مع بعض، نناقش المادة وصعوبتها ونشوف ليها حل برضه مع بعض …ما عادش حد بيشتغل دلوقتي لوحده أصبحنا كلنا بنشتغل سوا في تعاون … ده غير كمان الزيارات
المعايير: زيارات إيه؟؟ أنتوا بتزوروا مين؟؟ هو فيه حد عيان بعد الشر
الإرشاد: هههههههه … لأ مفيش … احنا بنزور بعض جوه الفصول لتبادل الخبرة وبترشدنا استمارات الزيارة الصفية اللي جايلوا ساعدنا نفهم بنودها ونطبقها … منها تقويم ذاتي لينا ومنها نعرف احتياجاتنا واحتياجات تلاميذنا … ده غير استمارات الاستراتيجيات … كل استراتيجية ليها استمارة … وكله معروف لكله مفيش حاجة بتستخبى علشان الخبرة تبقى عند الكل والكل يشارك… إحنا حتى كمان عملنا زيارات لمدارس تانية ومدارس جت كمان زارتنا … يعني مش بس جوه المدرسة .. لأ كمان بره
جوه وبره
بره وجوه
والإرشاد مدينا القوة
في التعليم .. دايماً تحسين
جوه وبره .. بره وجوه
(يردد ورائه من هم خارج المسرح الأغنية وهو يخرج/ على وزن أغنية عبد الحليم حافظ بكرة وبعده)
المعايير: هههههههههههه يا سلام طمنتني يا إرشاد … طمنتني يا وحدة التدريب … ايوه كده بيكم وبالكوادر هتفضل العملية من بعد جايلو ما يمشي زي الحديد .. خدوا بالكم كل يوم فيه جديد .. طيب إيه حكاية بره وجوه دي بس … هي في الزيارات وبس ولا TPD جايلو عمل حاجة بره المدرسة؟؟ يا ترى فيه ولا لأ؟ فيه ولا لأ؟
التوجيه يدخل: أنا أقول لك
المعايير: وسيادتك مين
التوجيه: أنا التوجيه الفني الرصين … اللي TPD جايلو ساعدوني أكون فعال وفي الشغل أمين … عارفين؟؟؟؟؟؟؟؟ أنا من سنين ما أخدتش ولا شفت تدريبات زي اللي إداها TPD جايلو … في تدريبات المدرسين يدعينا علشان نعرف هما بيتدربوا على إيه وليه؟؟ أخدنا شركا مش مستهدفين … عشان كده كنا بنساعده .. ده غير تدريب التوجيه الفني الفعال اللي كان عال العال … أنتم عارفين ؟؟
دول بالفيديوهات في اليوم الأخير دخلونا الفصل معاهم وخلونا نحكم على تنفيذ وتفعيل التعلم النشط وبيئة التعلم وأداء التلميذ … كنت فين يا TPD جايلو من زمان؟؟ كنت فين؟؟
جايلو… مغامرة حياتية
المعايير: طيب وإيه دوركم بعد ما يمشي؟
التوجيه الفني: متخافيش … لرسالته احنا لسه حاملين … وزي ما عودنا معاه لما كنا بنزور المدارس سوا هنكمل المشوار .. هننقل الخبرة للجاي جديد من المدرسين وهنتابع مع إدارة المدارس اجتماعات الإرشاد، وهنساعد مع وحدات التدريب … وبعدين استمارة SCOPE أنتم ناسيين … عموماً زورونا السنة اللي جاية من بعد جايلو وهتلاقوا الحكاية ماشية تمام لأننا لبصمته ولأثره مش ممكن هنكون ناسيين…
المعايير: كده أقدر أقولكم أن قلبي اطمن وارتاح … تعب TPD جايلو لا يمكن هايكون راح من أجل بلدنا احنا بنتعب … علشان العلم، والثقافة، والاعتماد على النفس احنا اشتغلنا وأبدعنا ونشطنا في مدارسنا .. ياللا (تلوح بالعلم) كلنا نختم كلامنا بسلامنا من أجل مصر وتعظيم سلام يا كل الـ TPD الجدعان … أحلى سلام
تنطلق أغنية النشيد ويقف الجميع يحيونه
بلادي بلادي بلادي
لك حبي وفؤادي
الكاتب ومؤلف المسرحية/ أسامة الأديب
استشاري تعليم وتنمية
اقرأ أيضًا
الأدب العالمي وشخصية التاجر اليهودي
حريق بلا مكان، رواية لأسامة الأديب (1)
مسرحية الوالي والبرغوث (بقلم أسامة الأديب)
من الحاكم بأمر الله إلى الحاكم بأمره (أسامة الأديب)
